Kryetari i LSDM-së, Zoran Zaev u paraqit në presidencë duke dorëzuar firmat, me të cilat i kërkon mandatin presidentit Gjorge Ivanov. Zaev arriti të sigurojë 67 firma, përfshirë këtu 10 nga BDI-ja, 5 nga BESA dhe 3 nga Aleanca për Shqiptarët. Zaev pret tani që brenda ditës, kreu i shtetit t’i ofrojë zyrtarisht mandatin për krijimin e qeverisë së re në Maqedoni.
Në deklaratën e shkurtër për mediat, Zaev tha se pret tranzicion të qetë të kalimit të pushtetit.
“Të nderuar qytetarë kjo është një ditë e madhe historike për Republikën e Maqedonisë. Në dorë po mbaj 67 firma të deputetëve nga Kuvendi i Maqedonisë që garantojnë mundësin për qeveri të re për qytetarët e Maqedonisë. Njëkohësisht këto nënshkrime mundësojnë që të përmbyllet kriza në Republikën e Maqedonisë dhe përfundimisht shteti të ecë përpara në funksion të kthimit të jetës në Maqedoni. Sot pres që zoti Ivanov ta dorëzoj mandatin sa më shpejtë që është e mundur, që të mund të fillojmë negociatat për formimin e qeverisë së re. Njëkohësisht e shfrytëzoj këtë rast që të apeloj deri tek të gjithë qytetarët por edhe tek institucionet e shtetit se pritet transfero i qetë dhe i shpejtë i pushtetit në Republikën e Maqedonisë”, deklaroi kryetar i LSDM-së Zoran Zaev.
Më herët, kreu i VMRO-DPMNE, Nikolla Gruevski i kërkoi Zaevit të mos pranojë një platformë nga Tirana. “Është koha që LSDM-ja të tregojë se dashuria ndaj atdheut është më e madhe se dëshira për pushtet”, thekson VMRO-DPMNE.
“Nëse LSDM-ja vendos të heqë dorë nga platforma nga Tirana dhe i hedh poshtë shantazhet joparimore për ridefinimin e shtetit, atëherë do ta ketë mbështetjen e VMRO-DPMNE-së edhe krahas asaj që qytetarët, mbështetjen më të madhe në zgjedhje ia dhanë programit të VMRO-DPMNE-së dhe Koalicionit për një Maqedoni më të mirë”, thuhet në reagimin për mediat.
Sipas VMRO-DPMNE-së, qytetarët nuk votuan për zyrtarizimin e gjuhës shqipe as për ndryshimin e banknotave për shndërrimin e Maqedonisë në shtet binacional dhe as për kantonizimin ose federalizimin e saj.
