Ambasadorja amerikane, Yuri Kim, vijon me mesazhet e forta lidhur me Reformën në Drejtësi.
Ajo deklaroi se disa persona ëndërrojnë që Byroja Kombëtare e Hetimit nuk do të themelohet dhe se drejtësia nuk do të vijë asnjëherë.
Me një postim në Twitter, kryediplomatja shkruan se ëndrra e tyre nuk do të bëhet realitet, dhe se reforma në drejtësi edhe pse sdo të jetë e lehtë, e shpejtë, ose perfekte, është e domosdosshme dhe duhet të vazhdojë para.
“Duket se ka disa që ëndërrojnë që Byroja Kombëtare e Hetimit nuk do të ngrihet kurrë. Ata shpresojnë që reforma në drejtësi nuk do të realizohet kurrë. Më vjen keq t’ju zgjoj nga dremitja, por ëndrra juaj nuk do të realizohet kurrë. Reforma në drejtësi nuk do të jetë e lehtë, e shpejtë ose perfekte, por është e nevojshme dhe duhet të ecë përpara.”, shkruan Kim.
Deklaratat e ambasadores së SHBA, vijnë pak orë pasi PD denoncoi zëvendësdrejtoren e Përgjithshme të Policisë Aida Hajnaj, e cila kandidon për postin e Byrosë kombëtare të Hetimit, duke thënë se është e përfshirë në një nga skandalet më të mëdha të Policisë së Shtetit, lirimin e të kërkuarit për trafik droge Naser Gashi.
Sipas PD, Hajnaj duhet skualifikuar nga gara për drejtuese të BKH, pasi sipas tij, “mbrojti policët që liruan trafikantin e drogës dhe pezulloi nga detyra policin që e denoncoi skandalin”./Opinion.al
