Xhevrije Satka është një shqiptare e lindur në Stamboll, por që një pjesë e zemrës së saj ka qenë gjithmonë në Shqipëri.
Në studion e emisionit “Opinion” në Tv Klan, ajo tregon se si familja e saj u larguan drejt Turqisë një vit para se Xhevrija të lindë. Ajo ka kaluar 30 vite të jetës së saj në Stamboll, ku në Shqipëri vinte vetëm kur kishte pushime për të takuar familjarët.
Duke qenë se punon për Spitalin Memorial në Turqi, Xhevrija është vendosur në Shqipëri për punën e saj ku ndihmon të gjithë shiptarët që kanë nevoja shëndetësore.
“Në ‘92 kanë lëvizur. Ne jemi tre fmëijë. Unë kam dy vëllezër, të cilët kanë lindur në Berat. Pastaj në ‘92 kanë lëvizur dhe pa mbushur vitin unë kam lindur në Stamboll. 30 vite kam jetuar në Stamboll, vetëm kam pasur udhëtime të shkurtra për pushime në Shqipëri. Nuk kalonin as tre, katër muaj në total koha që kam kaluar në Shqipëri. E kam thyer vitin e fundit. Në familje flisnim shqip sepse mami dhe babi nuk dinin Turqisht në fillim. Kur më ka lindur mami ka qenë shumë në ankth sepse ishte në një vend të huaj dhe thotë kam dhuruar të gjithë florinjt që kisha sepse mendoja se nuk do të të sillnin”, tha Satka.
Ndër të tjera ajo tregon edhe arsyen e vendosjes në Shqipëri për shkak të punës së saj.
“Unë këto vitet e fundit kam udhëtuar shumë shpesh për shkak të punës sepse futet në zhvillim biznesi në këtë punë që bëj unë. Duke qenë se shërbej për pacientët shqiptarë duhet të kisha sa më shumë kontakte”, tha ajo.
Xhevrije Satka shprehet se gjithmonë e ka tërhequr Shqipëria dhe ndryshe nga prindërit e saj, ajo nuk e kishte problem kthimin këtu.
“Mua Shqipëria më pëlqen shumë. Gjithmonë më ka tërhequr. Por prindërit duke qenë se kanë jetuar atë periudhën më të vështirë të jetës së tyre asnjëherë nuk e kanë konsideruar që të ktheheshin sepse ishin të traumatizuar mendoj. Ndërsa unë nuk e kam menduar kështu”, tha Satka.
