Ndodhi dje, në “Nike Store”, në Cyrih. Xherdan Shaqiri (24 vjeç) takohet me shokët e tij të ekipit kombëtar, Ricardo Rodriguez dhe Yann Sommer, si dhe me tifozët. Për çështjen e Kosovës, ai thotë: “Unë kam qenë shumë i lumtur që Kosova është pranuar në UEFA dhe FIFA. Por, unë luaj me shumë zemër për Zvicrën, jam plotësisht i përqendruar tek të bëjmë një Kampionat Europian shumë të mirë. Unë jam lojtar i Zvicrës, jap gjithçka për Zvicrën. Kjo është e vërteta dhe nuk ka asgjë për të diskutuar.” Një ndryshim kombëtareje, pra, për të luajtur me Kosovën, nuk është çështje për të. Sidoqoftë, ai është i zemëruar për shkak se Federata Zvicerane e Futbollit dhe askush tjetër nuk e ka pyetur për çështjen e caktimit të kapitenit të kombëtares helvete.
“Jo, askush nuk ka folur me mua. Unë mendoj se është pak e çuditshme kjo.” Një arsye kjo, pse ai ndihet i diskriminuar. Thënë më shkoqur, në rastin e caktimit të kapitenit, Shaqiri ndihet i patrajtuar mirë. Trajneri Vladimir Petkoviç njoftoi të mërkurën se Stephan Lichtsteiner do të ishte kapiteni, para Valon Behramit dhe Granit Xhakës. Shaqiri ka thënë: “Gjithkush dëshiron të jetë kapiten. Nga hierarkia, unë jam mbi të. Do të duhej të merrja pjesë në diskutimin mbi caktimin e kapitenit. Unë jam me të vërtetë i zhgënjyer. Petkovic më informoi në një bisedë personale, që nuk më përkiste mua shiriti i kapitenit. Megjithatë, nuk ka asnjë arsyetim, se pse një lojtar meriton apo jo të marrë këtë përgjegjësi të lartë në hierarkinë e kombëtares.”
Arsyetimi i tij: Me vetëm 24 vjet tashmë, ka 51 ndeshje në llogarinë personale me kombëtaren; si dhe 17 gola, duke qenë golashënuesi më i mirë i ekipit aktual. Top-golashënuesi, Alex Frei (42 gola) kishte të njëjtën moshë vetëm 8 gola në llogari, me kombëtaren. Një tjetër objektiv mund të jetë për t’u thyer, rekordi i Heinz Hermann (118 ndeshje me kombëtaren). Dhe, sidomos Shaqiri, është arma jonë sekrete për Shqipërinë. Ai shënoi në të dyja ndeshjet, kur ishim duke luajtur në kualifikueset e Kupës së Botës, kundër atdheut të Xhakës. Kjo na jep shpresë për nisjen si duhet të Europianit më 11 qershor, kundër shqiptarëve! Sepse, me zemërimin brenda, Shaqiri është ndoshta më i fortë. Shkruan “blick.ch”
