Wayne Rooney ka zbuluar se po planifikon të largohet përfundimisht nga kombëtarja angleze pas Botërorit “Rusi 2018”. Sulmuesi ka mbajtur shiritin e kapitenit te “Tre luanët” nën drejtimin e trajnerit të ri Sam Allardyce dhe do të udhëheqë skuadrën në ndeshjen e së dielës kundër Sllovakisë (për eliminatoret). Duke folur para sfidës, lojtari i Manchester Unitedit është kujdesur të paralajmërojë tifozët për fundin e karrierës së tij ndërkombëtare, duke këmbëngulur se e ka ndarë mendjen për vendimin e tij.
“Deri tani kam pasur një karrierë fantastike me kombëtaren dhe kam luajtur plot ndeshje. Kam shijuar çdo minutë, por një herë do të vijë edhe fundi. Nuk jam i vjetër, jam 30 vjeç. Mendoj se Rusia do të jetë koha e duhur për mua për t’i thënë lamtumirë futbollit ndërkombëtar. E kam ndarë mendjen, por varet nga Sam Allardyce. Botërori i ardhshëm do të jetë turneu im i fundit, nëse përzgjidhem. Kam pasur çaste të mira dhe të këqija, por jam një njeri krenar“, – u shpreh sot ai. Rooney është golashënuesi më i mirë i Anglisë me 53 gola në 115 ndeshje.
