Bursa e Wall Street duket se po “drogohet” nga kanabisi kanadez. Në më pak se një vit pas legalizimit që Kanadaja i bëri përdorimit të kanabisit për qëllime rekreative, grupet e investimit apo edhe investitorë individualë po bëhen pjesë e këtij biznesi. Siç shihet edhe nga grafiku i përgatitur nga Financial Times, kompanitë më të mëdha të kanabisit kanë rritur ndjeshëm kuotat e tyre në bursë nga muaji janar në mes të muajit mars.
Në një analizë, Financial Times jep rastet e Nelson Peltz dhe Anthony Scaramucci, dy sipërmarrësve që po kanalizojnë fondet e tyre në industrinë e kanabisit.
Nelson Peltz është një investitor i njohur amerikan, pjesë e shumë kompanive mes të cilave edhe “Procter & Gamble”, ndërsa tani sapo është bërë këshillues strategjik i “Aurora Cannabis”, kompanisë së licencuar të prodhimit të kanabisit. Kjo firmë operon në 18 vende, me një prodhim prej 500,000 kilogramë në vit, duke qenë kompania e dytë më e madhe e kanabisit në botë. “Aurora Cannabis” nisi të kuotohej në New York Stock Exchange në 23 tetor 2018.
Nga ana tjetër, Anthony Scaramucci i cili u rikthyer në kompaninë e tij të investimeve “SkyBridge” pas një eksperience si Drejtor i Komunikimit në Shtëpinë e Bardhë, po planifikon që të përfshijë edhe diskutimet për kanabisin në konferencën që organizon çdo vit në Las Vegas. “Kanabisi është shumë popullor”, është shprehur ai. “Brenda një dekade e gjysmë, industria do të ketë atë rritje që pati industria e internetit në fund të viteve ‘90”, parashikon Scaramucci./Opinion.al
