Disa qindra vetë, kryesisht të rinj, janë mbledhur të hënën në mbrëmje në protestë, në qendrën e Beogradit. Një ditë pas zgjedhjeve, protesta u organizuan edhe në Novi Sad dhe në Nish.
Qytetarët u mblodhën përmes rrjeteve sociale, ku u dërgua porosia për tubim nën thirrjen “Protestë kundër diktaturës”.
Me brohoritjet “Vuçiç, hajn”, “Vjedhje” dhe “Vuçiç nuk të duam”, në Beograd protestuesit u mblodhën përpara ndërtesës së Kuvendit të Serbisë prej nga u nisën në shëtitje protestuese drejt Sheshit të Republikës, pastaj nëpër rrugët e qytetit pranë ndërtesës së “Politikës” dhe Radio Televizionit të Serbisë, ndërtesës së Qeverisë, të cilën disa individë e goditën me vezë dhe deri tek selia e Komisionit Qendror të Zgjedhjeve për t’u kthyer deri tek Kuvendi.
Në tubim nuk kishte shenja partiake, as edhe fjalime zyrtare kurse në faqen e Facebook-ut është shkruar se protesta nuk ka njerëz që e drejtojnë.
Përpara ndërtesës së Kuvendit ndodhi një incident i vogël kur një grup hodhi shishe dhe vezë mbi policinë që provoi t’i afrohet shkallëve. Policia nuk reagoi dhe qytetarët kërkuan “ta mbronte popullin”.
Disa qindra të rinj u mblodhën, njëkohësisht, edhe në sheshin qendror të Novi Sadit, të pakënaqur me, siç thanë, zgjedhjet e parregullta presidenciale dhe censurën mediale.
“Kjo është një lloj gjysmë diktature e shekullit të 21 dhe thonë se është gjysmë demokracie, por nëse gjysmë demokracie ekziston atëherë ka edhe gjysmë diktature.
E kemi parë Sllobodan Millosheviçin dhe kjo është njësoj, ndaj duket si fillimi i një diktature klasike” shprehen protestuesit në Beograd.
