Është ndarë nga jeta, në moshë të re, prokurorja e Prokurorisë së Shkallës së Parë Elbasan. Lajmi është bërë i ditur nga Këshilli i Lartë i Prokurorisë, ku mësohet se prokurorja Erida Kokonozi ka humbur jetën në moshën 39-vjeçare.
Prokurorja vuante nga një sëmundje e rëndë dhe fatkeqësisht nuk ka mundur ta fitojë betejën me të.
Këshilli i Lartë i Prokurorisë në mesazhin e ngushëllimit shkruan se Kokonozi ka qenë një nga magjistratët e spikatur të sistemit të prokurorisë dhe se do kujtohet përherë me nderim.
“Këshilli i Lartë i Prokurorisë shpreh ngushëllimet e sinqerta për ndarjen e parakohshme nga jeta, në moshën 39 vjeçare, pas një sëmundje të gjatë, të prokurores Erida Kokonozi, e cila e ushtronte detyrën në Prokurorinë pranë Shkallës së Parë Elbasan.
Zonja Kokonozi ka qenë një nga magjistratët e spikatur të sistemit të prokurorisë, e cila e ka nderuar figurën e prokurorit, duke treguar një shkallë të larte integriteti dhe profesionalizmi në ushtrimin e detyrës.
Komuniteti i prokurorëve do ta kujtojë znj. Kokonozi përherë me nderim, për kontributin e saj të çmuar në fushën e drejtësisë. U shprehim ngushëllimet tona familjareve dhe të afërmve, për ndarjen e saj nga jeta”-shkruan KLP.
