Prokuroria e Tiranës ka kërkuar dënimin me 35 vite burg për Ludian Zaimin, efektivin e policisë që vrau me armë zjarri kolegun e tij, Caush Saliasi, brenda komisariatit nr.3 në kryeqytet.
Ngjarja e rëndë ndodhi mbrëmjen e 23 majit të vitit të kaluar, teksa po ndërroheshin turnet dhe në sallë ishin kolegët e tjerë. Zaimi duket se e kishte të qartë shënjestrën e tij ndaj i bëri thirrje efektivëve të pranishëm që të ulnin kokat.
Ludian Zaimi tha se kreu krimin për shkak se ishte bullizuar dhe fyer në mënyrë të vazhdueshme prej Caush Saliasit.
Referuar dëshmive të punonjësve të tjerë të policisë të pranishëm në ngjarje, i riu i është drejtuar 55-vjeçarit me fjalët “si do e lemë bashkë” dhe më pas e ka qëlluar disa herë me pistoletë.
Në banesën e 25-vjeçarit u gjetën medikamente antidepresantë, si edhe janë krijuar dyshime se ai ka pasur kontakt me një mjeke të shëndetit mendor.
Mbi 25-vjeçarin Zaimi rëndon akuza e “vrasjes me paramendim”.
