Gjykata e Tiranës ka dhënë masën e arrestit me burg, për autorin e vrasjes së dyfishtë në zonën e Astirit, 59-vjeçarin Përparim Ademi.
Në një dalje për mediat avokati i tij Arben Gramo, tha se Ademi ka pranuar akuzat e ngritura nga prokuroria, por u shpreh se pala mbrojtëse nuk ka qenë dakord me cilësimin ligjor.
“Përsa i përket cilësimit ligjor nuk kemi qenë dakord. Fillimisht është akuzuar për vrasje në rrethana cilësuese dhe kjo duhej të ishte kjo dispozita. Ai është i martuar de fakto. Për i përket bashkëjetesës shoqëria shqiptare nuk e pranon poligaminë. Prokuroria ka ndryshuar akuzën në versionin e dytë, në cilësimin ligjor neni 79 c, “vrasje për shkak të marrëdhënieve familjare”, që është më e rënda në kodin penal”, u shpreh avokati, duke shtuar se gjendja psikologjike e klientit të tij nuk është e mirë.
“Ai është pohues, i ka pranuar të gjitha versionet që jep organi procedures. Është i rënduar nga ana psikologjike dhe shëndeti i tij nuk është i mirë. Në vazhdimësi do të shohim si do të vazhdojë çështja”, pohoi avokati.
Përparim Ademi ka rrëfyer ppër hetuesit se fillimisht ai kishte qenë i lidhur me Kristina Bardhin, ndërsa më pas krijoi një raport initim me motrën e saj Zhaneta. Lidhje për të cilat ishte në dijeni edhe bashkëshortja e tij legale.
Ademi ka pohuar se me Zhanetën ka edhe fëmijë, të cilët nuk janë regjistruar në gjendjen civile, ndërsa me dy motrat dhe bashkëshorten e tij kishin bërë udhëtime në Greqi dhe Pogradec. Sikurse mësohet shkak i vrasjes është bërë xhelozia dhe dyshimet se Zhaneta po krijonte një lidhje tjetër.
Për këtë arsye, Përparim Ademi është afruar në banesën e saj paraditen e 31 Dhjetorit. Para se të ngjitej në apartament, ai ka marrë njërin nga fëmijët që po luante poshtë pallatit, përmes të cilit ka mundur të hyjë në banesë.
Dy motrat, Kristina Bardhi dhe Zhaneta Metani kanë qenë duke ngrënë. Në momentin që është hapur dera dhe motrat kanë parë Përparim Ademin, kanë tentuar të mbyllin derën. 59-vjeçari ka qëlluar me armë fillimisht në derë dhe më pas në drejtim të motrave. Në vendin e ngjarjes janë gjetur 26 gëzhoja plumbash, ndërsa vetëm 5 prej tyre kanë qëlluar motrat Bardhi e Metani.
Pasi ka kryer krimin, 59-vjeçari ka qëlluar nëpër muret e banesës dhe më pas ka lënë armën tip automatik kinez dhe është larguar nga vendi i ngjarjes./Opinion.al
