Gjykata Themelore e Prishtinës ka shpallur fajtor Skender Krasniqin, i cili vrau djalin e tij, Albert Krasniqi.
Përmes një njoftimi, gjykata bën me dije se ka shpallur fajtor Skender Krasniqin për veprën penale “Vrasje nga pakujdesia”, ndërsa është dënuar me 3 vite e 5 muaj burg.
“Gjykata Themelore në Prishtinë – Departamenti i Përgjithshëm Penal ka shpallur aktgjykimin kundër të akuzuarit S.K për veprën penale Vrasja nga pakujdesia nga neni 175 të Kodit Penal të Republikës së Kosovës. I akuzuari S.K është shpallur fajtor dhe është dënuar me burgim në kohëzgjatje prej tre (3) vite e pesë (5) muaj, i cili dënim do të ekzekutohet në afat prej 15 ditësh nga plotfuqishmëria e këtij aktgjykimi. Koha e kaluar nën masën e paraburgimit për të pandehurin do të llogaritet në dënimin e shqiptuar me burgim prej datës 27.01.2021”,-thuhet në njoftim.
Ngjarja e rëndë ndodhi më 27 janar të këtij viti, rreth orës 17:00. Skender Krasniqi njoftoi vetë policinë, duke thënë se kishte vrarë djalin.
Ndërsa pas tragjedisë, babai i të ndjerit ka qenë në gjendje të rëndë emocionale. Ndërsa armën e krimit e kishte blerë vetë viktima dhe ishte pa leje./Opinion.al
