Të tjera detaje kanë zbardhur mediat italiane për vrasjen e 49-vjeçarit shqiptar Demir Hyseni në Terni të Italisë. Ngjarja e rëndë ndodhi dje dhe brenda 12 orësh policia italiane ka arritur të arrestojë autorin e dyshuar, 60 vjeçarin shqiptar Kujtim Beli.
Të dy shqiptarët kanë jetuar për vite në Terni të Italisë. Dyshohet se konfliktet mes tyre janë zhvilluar në periudhën kohore 2013 dhe 2015. Ndaj autorit, ka edhe një denoncim në polici (të kësaj periudhe) nga ish-gruaja e tij, për dhunë në familje.
Siç shkruajnë mediat italiane, Beli dyshonte se në atë kohë gruaja e tradhtonte me Demir Hysenin, edhe ai i martuar dhe baba i një vajze të mitur. Më pas çifti Beli ishte larguar për në Gjermani ku mendohet se dhe janë divorcuar. Më pas Kujtim Beli është kthyer për të jetuar në Shqipëri, por duket se nuk e ka harruar hakmarrjen ndaj 49-vjeçarit që i mori jetën mëngjesin e djeshëm.
Ai ka hyrë në Itali me tragetin e linjës Durrës-Bari më datë 10 korrik. Të martën, 18 korrik Kujtim Beli ka shkuar tek pallati ku banonte Demir Hyseni dhe e ka pritur teksa zbriste nga pallati për të hipur në makinë. Të dy shqiptarët kanë debatuar në rrugë dhe më pas janë dëgjuar të shtënat e pistoletës.
Demir Hyseni, zdrukthëtar, 49 vjeç gjeti vdekjen e menjëhershme në rrugën Galvani në Terni ku banonte prej vitesh me familjen.
Nga hetimet e shpejta të policisë italiane, u arrit të bllokohej në Bari mbrëmjen e djeshme autori i dyshuar Kujtim Beli 60 vjeç. Ai po tentonte të largohej drejt Shqipërisë kur u ndalua nga karabinierët që ia vunë në dispozicion drejtësisë së Ternit. Mediat italiane që citojnë burimet nga grupi hetimor, thonë se pista kryesore është ajo e vrasjes për motive të dobëta, si pasojë e xhelozisë dhe prishjes së kurorës martesore. /Në shqip: Opinion.al
*Në foto autori i dyshuar Kujtim Beli
