Policia e Durrësit ka arritur të zbardhë ngjarjen e mbrëmjes së djeshme në qytetin bregdetar, ku mbeti i vrarë një shtetas dhe u plagos një tjetër.
Pas një pune intensive policia ka arrestuar një prej autorëve, Bledar Kajno, 39 vjeç, banues në Xhafzotaj. Ndërkohë që është shpallur në kërkim dhe po punohet për kapjen e autorit tjetër, Gëzim Kajno, 31 vjeç, banues në Durrës, pronar i lokalit ku ndodhi ngjarja.
Në lidhje me dinamikën e ngjarjes së djeshme sipas policisë, shtetasit Gëzim dhe Bledar Kajno nën efektin e alkoolit dhe për motive të dobëta janë konfliktuar me viktimën Asllan Kërtusha në ambientet e brendshme të lokalit.
Më pas, në konflikt e sipër, kanë dalë jashtë lokalit ku shtetasi Gëzim Kajno e ka goditur me qytën e pistoletës në kokë Kërtushën, dhe si pasojë e një shkrepje të armës së zjarrit është plagosur në krah shtetasi Bledar Kajno.
Po me të njëjtën pistoletë, shtetasi Gëzim Kajno ka qëlluar Kërtushën, i cili nga plagët e marra ka ndërruar jetë në Spitalin Rajonal Durrës.
Në vendngjarje, në cilësinë e provës materiale u gjetën dhe u sekuestruan:
- dy gëzhoja model 54 kalibri 7.62 m/m dhe
- 3 copë fishekë kalibri 7.62 m/m.
Por edhe viktima, Asllan Kërtusha, 30 vjeç, banues në Durrës, ishte një person i njjohur nga policia. Ai figurin me precedentë penalë të mëparshëm duke konsumuar disa vepra penale si: vjedhje, në fushën e lëndëve narkotike, kundërshtim i Punonjësit të Policisë, konflikte në lokalet e natës si edhe ka pasur lidhje shoqërore me persona me precedentë penalë./tvklan
