ELBASAN- Një ditë pas vrasjes së Saimir Beqirit në Elbasan dhe publikimit në media të konfliktit disa vjeçar Capja-Beqiri, policia ka dalë në një komunikatë ku nuk thotë asgjë për autorët e dyshuar apo mënyrën se si ndodhi ngjarja.
Policia thotë vetëm se ka arrestuar një roje. Sipas njoftimit, 42-vjeçari akuzohet për moskallëzim krimi sa i përket vrasjes së 51-vjeçarit, Saimir Beqiri.
“Shkëlqim Salla ka qenë roje i karburantit në vendin ku ndodhi vrasja. Nga hetimet paraprake rezulton se, 42-vjeçari ka parë ngjarjen dhe nuk e ka kallëzuar”, thotë policia.
Të hënën në mëngjes, në lagjen “Skëndërbej” të Elbasanit, në afërsi të një pikë karburanti, u gjet i vrarë me armë zjarri 51-vjeçari, Saimir Beqiri. Në vendngjarje grupi hetimor ka gjetur 6 gëzhoja, kalibër 9mm, 2 copa predha.
Viktima është vëllai i Gentian Beqirit, 41-vjeçari që u vra në vitin 2012 brenda në banesën e tij, teksa ruhej nga policia në arrest shtëpie. Ky i fundit ishte i dënuar si i implikuar në vrasjen e biznesmenit Sokol Çapja, në vitin 2005.
Për vrasjen e Gentian Beqirit u ndalua Florenc Capja. Por ai u lirua pasi paraqiti prova që kishte qenë në Maqedoni në momentin e vrasjes. Ndaj familjes Capja me datën 3 shkurt të këtij viti u krye një atentat me armë zjarri ku mbeten të vrarë 3 persona dhe të plagosur 9 të tjerë, mes të cilëve edhe Florenc Capja. Pista kryesore e hetimit për vrasjen e Saimir Beqirit është ajo e hakmarrjes për shkak të konfliktit mbi 11-vjeçar me familjen Çapja./Opinion.al
