Gazetarja Klodiana Lala ka folur në lidhje me vrasjen e Santiago Malkos, duke u shprehur se me zbardhjen e kësaj ngjarje do të preken emra të njohur të botës së krimit në Shqipëri.
Lala shprehet se do të zbulohen emra të cilët kanë lidhje me vrasjen e Malkos, por dhe me një seri ngjarjesh të tjera kriminale të ndodhura në Tiranë, Laç dhe Durrës.
“Kjo ngjarje do të zbardhet, madje mendoj se do të preken emra të njohur të botës së krimit, që mund të jenë përfshirë në këtë ngjarje, por edhe në ngjarje të tjera kriminale. Nëse SPAK do hetojë gjitha pasuritë e tyre, lidhjet e tyre me politikën dhe zyrtarë të lartë, do të kemi një sërë ngjarjesh të tjera që do të zbardhen. Nëse dosja nuk do fokusohet vetëm te vrasja e Malkos, do zbulohen shumë vrasje të ndodhura në Tiranë, Laç e Durrës, në të kundërt këta persona do të arrijnë t’ia hedhin. Kjo do ishte një dramë e madhe, pasi askush nuk kishte të drejtën t’i merrte jetën Malkos. Secili duhet të mbajë peshën për atë që i takon”, tha gazetarja.
Gazetarja ka thënë gjithashtu se banda e cila ekzekutoi Malkon në fund të muajit gusht të këtij viti, merren edhe me trafikun e lëndëve narkotike, kryesisht kokainë. Sipas Lalës, Leonard Duka është kreu i kësaj bande, ndërsa thekson se ai është i përfshirë dhe në një vrasje në Laç edhe në ngjarjen e ndodhur në zonën e ish-Bllokut.
“Ka dyshime të forta që ky grup kriminal merret dhe me trafikimin e lëndëve narkotike. Leonard Duka u arrestua në prill të këtij viti. Në momentin e arrestimit, ai hodhi pistoletën nga banesa. Janë një grup i organizuar dhe më parë janë sekuestruar dy automjete të blinduara me targa ruse. Eksponentë të krimit të organizuar kanë lidhje të ngushta e të forta me punonjës të policisë, ndaj dhe ndonjëherë duke i përdorur ata, e ndonjëherë duke paguar shuma të mëdha, ja kanë hedhur drejtësisë. Kjo ngre dyshime të forta për mënyrën se si funksionon policia shqiptare. Leonard Duka ka dyshime të forta se është kreu i një grupi që merret me trafikimin e drogërave të forta. Është arrestuar një herë për kokainë, ndërsa tani rezulton të jetë organizator i Santiago Malkos. Ai rezulton i përfshirë dhe në një vrasje në Laç, i përfshirë në vrasjen e ndodhur në zonën e ish-Bllokut. Ishte filmuar me armë në dorë, por policia nuk kishte reaguar për ta arrestuar. Ka dyshime që Duka ka vepruar si grup i strukturuar kriminal, ndaj dhe Prokuroria e Tiranës e kaloi dosjen te Krimet e Rënda, dosje që pritet të sjellë mjaft surpriza”, theksoi Lala./ Opinion.al E.Xh.
