Gjykata ka vendosur masën “Arrest me burg” për të ndaluarin Mikel (Gjovalin) Alia, i dyshuar si bashkëpunëtor në vrasjen e Eri Zefit, mbrëmjen e 2 tetorit në Zall-Xhuxhë të Mirditës.
Gjatë ditës së djeshme Alia u dorëzua në polici, por nuk pranoi akuzat për bashkëpunim në ekzekutimin e shokut të tij të fëmijërisë.
Zefi mendohet të jetë ekzekutuar për shkak të gjakmarrjes. Vëllai i tij, Ndue Zefi vrau fqinjin e tij, 45-vjeçarin Martin Ndreca pas një sherri për motive të dobëta. Ngjarja ka ndodhur në qytetin e Durrësit dhe pak ditë pas krimit, Zefi u dorëzua në polici.
Që prej asaj kohe Eri Zefi i kishte rralluar shumë daljet për shkak të frikës së gjakmarrjes dhe mbrëmjen e ekzekutimit të tij, doli së bashku me shokun e tij të fëmijërisë Mikel (Gjovalin) Alian dhe mendohet se ky i fundit e ka çuar në vendin ku i është zënë prita. Eri Zefi u ekzekutua me 6 plumba./Opinion.al/
