I penduari i drejtësisë Nuredin Dumani ka rrëfyer këtë të martë, për disa minuta, në procesin që po zhvillohet për vrasjen e Emiljano Ramazanit, detaje mbi krimin.
Sipas Tv Klan, Dumani i konfirmoi Gjykatës se për vrasjen e Ramazanit, ai vetë kishte qenë organizator dhe ngjarja është bërë me porosi të Erion Alibejt.
“Për vrasjen e Emiljano Ramazanit unë kam qenë në rolin e organizatorit të ngjarjes, ku kam bashkëpunuar edhe me Henrik Hoxhajn dhe Skerdi Tasen, ky i fundit ishte personi që qëlloi ndaj tij. Vrasjen e kemi kryer me porosi të Erion Alibejt. Unë sigurova mjetin e vrasjes dhe informacione në lidhje me mjetin me të cilin lëvizte Ramazani dhe rutinën e tij të ditës. Drejtues i mjetit me të cilin u krye vrasja ishte Henrik Hoxhaj dhe ekzekutimin e ka bërë Skerdi Tase”, është shprehur Dumani.
Kjo dëshmi e Dumanit mbështetet edhe nga të dhënat që ka dhënë bashkëpunëtori tjetër i drejtësisë, Henrik Hoxhaj, i cili pretendon se për ngjarjen kanë marrë në total 90 mijë Euro.
Në seancën e kësaj të marte, Nuredin Dumani gjithashtu tregoi detaje për vrasjen e Regis Runajt, i cili u ekzekutua me thikë disa ditë pas vrasjes së Ramazanit në Elbasan.
Në të dyja ngjarjet, dyshohet se janë të përfshirë edhe shtetasit Xhuljano Hoxha dhe Euglent Halilin, ndërsa në cilësinë e porositësit dyshohet Erion Alibej.
Atentati mafioz ku mbeti i vrarë Emiljano Ramazani ndodhi më 20 korrik 2020. Vrasja është kryer poshtë shtëpisë së tij, teksa Ramazani po parkonte automjetin tip “Ford Fokus”./Opinion.al
