Janë mbyllur hetimet nga ana e Prokurorisë së Fierit për vrasjen e Elton Javorit dhe janë dërguar për gjykim 5 shtetas në lidhje me ngjarjen.
Konkretisht bëhet fjalë për dy vëllezër dhe tre persona të tjera. Ata do të gjykohen për moskallëzim krimi dhe përkrahje të autorit.
Vëllezërit Kreshnik dhe Agim Gashi, akuzohen për kryerjen e veprave penale “Vrasja me paramendim” kryer në bashkëpunim, dhe “Mbajtja pa leje dhe prodhimi i armëve, armëve shpërthyese dhe i municionit”.
Shtetasi R.P., akuzohet për kryerjen e veprës penale “Përkrahja e autorit të krimit”. Për shtetasin A.L., rëndon akuza “Moskallëzimi i krimit”. Sakaq, shtetasja E.Xh., akuzohet për kryerjen e veprës penale “Deklarimi i rremë përpara oficerit të policisë gjyqësore”.
“Prokuroria Fier përfundon hetimet dhe dërgon në gjyq dy vëllezër për vrasjen e shtetasit E.J., dhe tre persona të tjerë për moskallëzim krimi e përkrahje të autorit. Prokuroria pranë Gjykatës së Shkallës së Parë të Juridiksionit të Përgjithshëm Fier, përfundoi hetimet dhe dërgon në gjyq shtetasit K.G. dhe A.G. të akuzuar për kryerjen e veprave penale “Vrasja me paramendim” kryer në bashkëpuim, dhe “Mbajtja pa leje dhe prodhimi i armëve, armëve shpërthyese dhe i municionit”, parashikuar nga nenet 78/1 e 25, dhe 278/1 të Kodit Penal, si dhe shtetasin R.P. i akuzuar për kryerjen e veprës penale “Përkrahja e autorit të krimit” e parashikuar nga neni 302/1 i Kodit Penal; shtetasin A.L. i akuzuar për kryerjen e veprës penale “Moskallëzimi i krimit” parashikuar nga neni 300 i Kodit Penal; dhe shtetasen E.Xh. e akuzuar për kryerjen e veprës penale “Deklarimi i rremë përpara oficerit të policisë gjyqësore” e parashikuar nga neni 305/b i Kodit Penal.
Në përfundim të hetimeve të plota dhe dinamike, përfshirë edhe përdorimin e metodave proaktive mbi procedimin penal nr.1727 të vitit 2023, rezultoi e provuar se, në datë 07.12.2023, rreth orës 11:00, në lagjen “16 Prilli”, Rruga “Kujtim Majaci” të qytetit të Fierit, të pandehurit K.G. e A.G., vëllezër, në bashkëpunim mes tyre, kanë qëlluar me armë zjarri në drejtim të mjetit tip “Porsche Cayenne”, i drejtuar nga shtetasit E.J., i moshës 41 (dyzet e një) vjeç, i cili ndërroi jetë.
Në vijim, Prokuroria pranë Gjykatës së Shkallës së Parë Juridiksionit të Përgjithshëm Fier shpreh angazhimin e plotë për hetimin dhe vënien para përgjegjësisë ligjore të personave që kryejnë vepra penale kundër jetës dhe shëndetit“, njofton organi i akuzës, Fier.
Detajet e krimit
Ngjarja e rëndë ndodhi më 7 dhjetor 2023, rreth orës 11:00, në lagjen “16 Prilli”, rruga “Kujtim Majaci” në Fier.
Kanë qenë dy vëllezërit, tashmë të pandehur, të cilët kanë qëlluar me armë zjarri në drejtim të automjetit tip “Porche Cayenne”, që drejtohej nga 41-vjeçari, Elton Javori, i cili humbi jetën si pasojë e plagëve të marra.
Vrasja e tij u bë rreth 100 metra larg banesës së tij, ku ai jetonte me prindërit. Asokohe kishte rreth tre muaj që ishte kthyer nga Gjermania.
Sipas uniformave blu, mes Javorit dhe vëllezërve, ka pasur një konflikt të mëparshëm për motive të dobëta. Rreth 10 ditë para krimit, në një lokal të Fierit, Javori dhe një prej vëllezërve janë fillimisht kishin debatuar verbalisht e më pas viktima e kishte goditur me grusht Gashin. Dyshohet se ky e fundit nuk e kishte harruar këtë grusht dhe në momentin e parë që u takuan, rezultati ishte tragjik. /tvklan.al
