Vrasja e Elton Javorit në Fier/ Policia: Mes palëve pati shkëmbim zjarri, autori ishte bashkë me vëllain

Policia ka dhënë detaje të reja lidhur me vrasjen e Elton Javorit paraditen e së enjtes në Fier.
Në një njoftim për mediat bëhet me dije se në lagjen “16 Prilli”, Fier, nga një automjet tip “Benz”, nga krahu i pasagjerit, është qëlluar me armë zjarri në drejtim të automjetit tip “Fuoristradë” e cila drejtohej nga Elton Javori.
Pas këtij veprimi, edhe 41-vjeçari është kundërpërgjigjur duke qëlluar disa herë me armë zjarr pistoletë në drejtim të automjetit tip “Benz”.
Si pasojë e shkëmbimit të zjarrit, 41-vjeçari ka mbetur i vrarë.
Nga hetimet rezultoi se autorët që udhëtonin me automjetin tip “Benz” janë Agim dhe Kreshnik Gashi (vëllezër), të cilët janë shpallur në kërkim dhe po punohet intensivisht për kapjen dhe vënien e tyre përpara përgjegjësisë ligjore.
Nga kqyrja e vendit të ngjarjes, në afërsi të automjetin tip “Fuoristradë”, u gjet 1 armë zjarri pistoletë me nr. trupi të paidentifikuar e cila u sekuestrua në cilësinë e provës materiale.
Motivi i kësaj ngjarjeje kriminale dyshohet një konflikt i nisur disa kohë më parë midis shtetasit Agim Gashi dhe shtetasit Elton Javori për motive të dobëta.
Në drejtimin e Prokurorisë vijon puna hetimore për sqarimin e rrethanave të kësaj ngjarjeje dhe mbledhjen e te gjitha provave për dokumentimin e plotë të saj.
Materialet procedurale janë referuar në Prokurorinë pranë Gjykatës së Shkallës së Parë të Juridiksionit të Përgjithshëm Fier, në ngarkim të shtetasve Agim Gashi dhe Kreshnik Gashi, të dyshuar për kryerjen e veprës penale “Vrasje me paramendim” e kryer në bashkëpunim dhe “Prodhimi dhe mbajtja pa leje e armëve dhe municionit luftarak”.