Duket se personi që mbahet në burg për vrasjen e Gazmend Çollakut do të dalë i pajafshëm. Ekspertiza ka treguar se gjurmët e gjakut të gjetura në këmishën e viktimës nuk janë të të dyshuarit Denis Shtraza. Krahasimi i të dhënave të gjakut me gjurmët e gjetura është bërë pas kërkesës së policisë së Durrësit, për të vërtetuar nëse gjurmët janë të njëjta.
Denis Shtraza 33 vjeç, për policinë, ai është një person me tendenca të theksuara kriminale, si dhe me precedentë penale në fushën e veprave penale kundër jetës dhe i dyshuar si anëtar i një grupi kriminal që operon në zonën e Durrësit dhe të Tiranës.
Ai u plagos në një atentat të ndodhur më 5 Shkurt të vitit 2013, pranë Fabrikës së Cigareve në Durrës. Bashkë me të gjendej edhe Elvis Tafaruçi, i cili u vra në muajin maj të vitit 2013 pranë Shkëmbit të Kavajës.
Aktualisht 33-vjeçari mbahet në burg për akuzat “Rrëmbimi ose mbajtja peng e personit” dhe “Vrasje e kryer në bashkëpunim”.
Ngjarja
40-vjeçari Gazmend Çollaku, u rrëmbye më 6 janar në qytetin e Durrësit dhe një ditë më pas është gjetur i vdekur dhe i lidhur me këmbë e duar në afërsi të fshatit Murqin të Krujës. Viktima ishte qëlluar me armë në kokë dhe fillimisht mendohet se ekzekutimi i tij ka lidhje me vrasjen e dy të rinjve, Ervin Kodra dhe Endri Caushaj, ngjarje e ndodhur në muajin dhjetor pranë hyrjes së Portit të Durrësit. Çollaku u mor peng nga 4 persona të veshur me uniforma policie dhe dëshmitarët në vendngjarje menduan se bëhej fjalë për një shoqërim të tij. Më parë në 2 mars të 2008-ës, pas një sherri banal mes të rinjsh në disko “Riviera” në lagjen numër 1 të Durrësit, Gazment Çollaku plagosi rënë me armë zjarri Kreshnik Ballën.
