Gazetari Artan Hoxha ka dhënë detaje për vrasjen me snajper të biznesmenit Kastriot Reçi në Rrëshen. I ftuar në Abc News ai tha se viktima ishte një emër i njohur dhe duket se për vrasjen e tij janë paguar shumë para.
“Vetëm snajperi bën mbi 20 mijë euro” ,tha Artan Hoxha. Sa i përket autorit që kreu vrasjen, gazetari tha se “ka vepruar me saktësi kirurgjikale”, duke shtuar se “goditje të tilla nuk i bëjnë dot as Forcat Speciale të Policisë së Shtetit”.
“Mënyra e realizimit të vrasjes më tremb, ngjarja ka ndodhur ditën në një qytet të vogël. Mënyra se si është realizuar tregon se nuk është vrasës i rëndomtë. Është saktësi kirurgjikale, ka pasur shumë njerëz, mund të shkaktonte dëme të tjera nëse autori do të kishte zgjedhur armën tradicionale në Shqipëri, kallashnikovin. Vetëm fakti që ky lloj vrasësi është i lirë përbën rrezik. Edhe Forcat Speciale po ta marrin për sipër atë lloj goditje nuk e dimë nëse do ta realizojnë me përpikmëri. Sot kemi një ekzekutor që hyn në skenën e krimit i cili mund të ketë përdorur disa veshje edhe pse këtë nuk e dimë me saktësi. Lënia e armës në vendin e ngjarjes ka ndodhur sepse arma e ekspozonte gjatë largimit. Kostoja e një krimi është mundësia që ke për ta realizuar një vrasje, të gjesh qitës të këtij niveli ka një kosto shumë të madhe. Nuk gjendet një snajper kaq lehtë. Viktima e Rrëshenit ruhej, lëvizjet e tij ishin të kufizuara që në momentin e ekzekutimit të vëllait të tij në Romë. Kjo ngjarje është pak a shumë si vrasjet në Tropojë por distanca është e largët. As në Belgjikë apo Romë nuk janë kapur autorët, instancat janë të paafta deri tani për të ndëshkuar autorët. Viktima që humbi jetën në Rreshen është njeri i njohur”
Për të zbardhur ngjarjen, janë sekuestruar disa kamera sigurie si dhe janë marrë në pyetje disa persona në cilësinë e dëshmitarit, por më pas janë lënë të lirë. Burime nga policia e Lezhës bëjnë me dije se autori ka qenë i maskuar si femër dhe në kokë mbante një paruke të cilën e ka hedhur në dalje të qytetit të Rrëshenit.
Ngjarja e rëndë ndodhi paraditen e së martës, kur Kastriot Reçi u qëllua me një plumb pranë lokalit të tij në qendër të Rrëshenit. Ndërkohë, policia e Lezhës ka vendosur një shpërblim prej 2 milionë Lekësh për çdo informacion që do të çonte në kapjen ose identifikimin e autorëve.
Dy vite më parë, në Itali u ekzekutua edhe vëllai i viktimës, 47-vjeçari Gasper Reçi, i cili dyshohej se merrej me shitje dhe trafikim të lëndëve narkotike./ Opinion.al
