Policia ka gjetur armën pistoletë që dyshohet se 19 vjeçarja Hygerta Meta e ka përdorur për të vrarë të atin, Pëllumb Meta, 50 vjeç. Arma është gjetur në një kënetë pranë fshatit Shënavlash, ku edhe ndodhi ngjarja.
Hygerta Meta, studente në Tiranë u arrestua pasi ka marrë përsipër vrasjen me armë zjarri të atin në kasollen e lopës dhe më pas trupi i tij u varros në oborrin e banesës në fshatin Shënavlash të Durrësit.
Krimi i rëndë, i cili u zbulua sot (23 shkurt ), sipas policisë mendohet se ka ndodhur ditë më parë, ndërsa trupi i 50-vjeçarit, Pëllumb Meta u gjet sot i varrosur në oborr, rreth 70 metra larg banesës.
Gjithçka nisi dhjetë ditë më parë, më 13 shkurt ora 22:30 kur djali i tij Hysen Meta bëri denoncimin në polici për zhdukjen e të atit. Menjëherë më pas u vu në lëvizje Sektori i Krimeve të Rënda në Policinë e Durrësit për të zbardhur krimin e rëndë. Mendohet se vrasja është kryer tre ditë para denoncimit, pra 10 shkurt.
Ekspertët e kriminalistikës e gjetën kufomën të zhveshur dhe të mbështjellë me plastmas.
Studentja 19 vjeçare ka pranuar krimin duke deklaruar në polici se i ati e kishte detyruar që të fejohet pa dëshirën e saj dhe madje ka çuar grupin hetimor drejt vendit ku ishte varrosur i ati.
“E kreva unë këtë punë dhe nuk pendohem që e kam vrarë tim atë. Ai na ka torturuar dhe i ka nxirë jetën nënës sime. Për gjithçka fliste dhe vendoste babai. Ai nuk na pyeste kurrë çfare dëshironim.Kur mori vendimin për martesën time, aty erdhi fundi’ ka dëshmuar ajo.
Por pas këtij krimi ka shumë pikëpyetje që duan përgjigje. 19-vjecarja ka deklaruar se ka kryer vrasjen dhe fshehjen e kufomes e vetme, por hetuesit dyshojnë se ajo fsheh bashkëpunëtorët, ndaj sot kryen inskenim, duke e çuar autoren e dyshuar në vendin e krimit për të treguar dinamikën.
Trupi i Pëllumb Metës me peshë 90 kg u gjet i varrosur 70 metra në distancë nga banesa në oborr . Kjo do të thotë se transportimi i tij është i pamundur të bëhet vetëm. Po kështu viktima është mbështjellë me plasmas dhe varrosur 1.5 metra thellë çka sjell dyshime se ajo nuk ka vepruar e vetme dhe dyshohet se persona të tjerë kanë qenë bashkëpunëtorë në krim. Hetuesit po verifikojnë rolin e familjarëve të cilët janë marrë në pyetje. Gruaja e viktimës, Blerina Meta është marrë në pyetje dhe ka deklaruar se burri i saj ishte autoritar dhe ndonjëherë i dhunshëm, kur e kundërshtonin në familje, por ka thënë se s’kishte dijeni për krimin.
Ndërkohë trupi i 50-vjeçarit është zhvarrosur dhe është transportuar në Institutin e Mjekësisë Ligjore, për kryerjen e ekspertizës së mëtejshme.
Familja ishte me origjinë nga fshati Shën Mëri i Krujës përbëhej prej 6 anëtarësh, burri, gruaja, 2 djem e 2 vajza. Viktima punonte si roje tek tregu i makinave.
