Mediat greke, vijojnë të publikojnë, detaje nga ngjarja e rëndë e ndodhur në Mykonos, ku 34-vjeçari shqiptar, Visar Dakrama u vra mëngjesin e të hënës.
Thanasis Nazos, 33-vjeç, vrau shqiptarin pas një debati që patën në një lokal në ishull.
Sipas informacioneve të protothema.gr, autori i vrasjes do të pretendojë se ka qenë i dehur, gjë që ka bërë që të jetë konfuz dhe të humbasë veten duke shpresuar se do të marrë një dënim më të butë nga autoritetet gjyqësore.
Ndërkaq media greke bën me dije se persona të afërt me autorin e ngjarjes pohojnë me siguri se ky nuk është krim pasioni. “Vajza për të cilën ka pasur një keqkuptim nuk ka marrëdhënie romantike me Thanasis”, tregon një person nga rrethi i tij i ngushtë për protothema.gr.
Ndërsa miqtë e të riut shqiptar tregojnë për protothema.gr se babai i tij ishte polic në Shqipëri, ndërsa vëllai i tij jeton në Angli, ku punon në ndërtim.
Për shumë vite, 34-vjeçari punonte në ishull si elektricist. Në të njëjtën kohë, sipas informacioneve të protothema.gr, ai kishte arritur të ndërtonte një shtëpi luksoze në Çorë, të cilën ua jepte me qira turistëve përmes platformës booking.com për 800 euro nata gjatë muajve të verës.
Shtëpia që viktima bleu në Ornos i kushtoi 150 mijë euro dhe ishte ëndëra e tij e jetës. Ai arriti ta rinovonte, duke ndërtuar edhe një pishinë të vogël në tarracë për të rritur vlerën e blerjes së pronës dhe për ta dhënë me qira me çmim të lartë për turistët.
