Mazhoranca miratoi pasditen e së mërkurës vetëm me votat e saj dekretet e shkarkimit dhe emërimit të Ministrave të rinj të kabinetit qeveritar. Dekretet për emërimin e Ministrave të rinj kanë marrë 77 vota. Ndërsa shkarkimi i Ministrave Gjiknuri dhe Kumbaro dhe i zëvendëskryeministres Mesi u bë me 76 vota.
Senida Mesi shkarkohet me 76 vota pro, emërohet zëvendëskryeministër Erjon Braçe me 77 vota
Arben Ahmetaj shkarkohet me 77 vota, emërohet Ministre e Ekonomisë dhe Financave Anila Denaj me 77 vota
Damian Gjiknuri shkarkohet me 76 vota, emërohet Ministre e Energjisë dhe Infrastrukturës Belinda Balluku me 77 vota
Lindita Nikolla shkarkohet me 77 vota, emërohet Ministre e Arsimit Sportit dhe Rinisë Besa Shahini me 77 vota
Mirela Kumbaro shkarkohet 76 vota, emërohet Ministre e Kulturës Elva Margariti me 77 vota
Shkarkohet Niko Peleshi me 77 vota, emërohet Ministër i Bujqësisë Bledi Çuçi me 77 vota.
Sonila Qato shkarkohet me 77 vota, emërohet Ministër për Sipërmarrjen Eduard Shalsi me 77 vota
Elisa Spiropali emërohet si ministre për Marrëdhëniet me Parlamentin me 77 vota
Krerët e grupeve parlamentare të PD-LSI, kërkuan që të zhvillohet debat lidhur me dekretet dhe për këtë thanë se kishin paraqitur dhe listën e diskutantëve.
Por një gjë e tillë u kundërshtua nga kreu i grupit parlamentar të PS-së, Balla dhe kryesuesi i seancës Gramoz Ruçi, i cili nisi votimin.
Pas kësaj deputetët e opozitës në mënyrë demonstrative bllokuan fillimisht foltoren dhe më pas lanë sallën pa marrë pjesë në votim.
Spaho: Nuk kemi bërë kërkesë për mënyrën e votimit, por kemi bërë kërkesë që shqyrtimi i dekreteve për ndryshimin e qeverisë bëhet me debat. Kemi paraqitur listën e folësave për çdo grup parlamentar. Mbi bazën e kësaj kërkese kërkojmë të zhvillohet debat sepse na mbështet rregullorja dhe Kushtetuta. Njofto që do të zhvillohet debat për shkarkimin dhe emërimin e Ministrave.
Vasili: Kemi biseduar dhe me stafin tuaj, i cili kërkoi ndryshe nga herët e tjera të depozitoheshin që përpara dhe zyrtarisht lista e diskutantëve. E kemi kryer këtë procedurë. Nuk ka asnjë pikë të vetme të rregullores që ndalon diskutimin dhe debatin. Po prisnim që ju të prezantonit listën e diskutantëve, sikundër rregullorja e kërkon. Kërkoj dhe dua të di arsyet se pse kjo nuk u njoftua nga ana juaj.
Balla: Në rregulloren e Kuvendit ka nen për emërim-shkarkim të Presidentit, për emërim-shkarkim të qeverisë kur bëhet fjalë për mocion mosbesimi.Jam me katër mandate në këtë Kuvend dhe asnjëherë nuk kemi bërë debat për emërim-shkarkim Ministrash. Jeni njoftuar që dje për urdhrin e thirrjes së seancës.Nuk është seancë e jashtëzakonshme por sesion i jashtëzakonshëm.Kryeministri ka kërkuar votimin e dekreteve për emërim dhe shkarkim. Bëni kërkesën mocion me debat me qeverinë, po keni forcë bëni dhe mocion mosbesimi ndaj qeverisë por ne kohë për të humbur me ju për llogje pazari sa herë tu teket ju dhe kur të doni ju, nuk ua japim këtë dëshirë.
Mediu: Sot ne kemi përbërjen e këshillit të ministrave dhe koha duhet të jetë dyfish i debatit. Nuk ka asnjë nen që ndalon debatin. Debati për ndryshimin e qeverisë është debat publik dhe ju doni të ndaloni Kuvendin e Shqipërisë. Vetëm në një Republikë bananesh ndodh kjo.Jemi këtu si parlamentarët dhe jo si mbështetës dhe zëdhënës të qeverisë.
Ruçi: Jam konsultuar dhe në asnjë nen të rregullores nuk thuhet që dekretet e presidentit për emërime dhe ç’ermërime bëhen me debat.
