Kur kanë mbetur pak më shumë se dy javë për regjistrimin në zgjedhjet e 11 Majit, PD ka zhvilluar takimin e radhës me diasporën në Hamburg të Gjermanisë.
Teksa i kërkoi qytetarëve që jetojnë jashtë vendit që të regjistrohen për të votuar, Sekretari i Përgjithshëm, Flamur Noka tha se vota e tyre do të ndëshkojë socialistët dhe do të shpëtojnë Shqipërinë nga keqqeverisja.
“Me votën tuaj, do të impononi të mirën për të cilën ka nevojë jetike ai vend. Diaspora do të jetë prioriteti i qeverisjes së Sali Berishës dhe Partisë Demokratike. Mos neglizhoni asnjë votë. Verdikti juaj do të jetë ai që do vendosë përfundimisht”, shprehet Noka.
Krahas akuzave për korrupsion, anëtari i kryesisë së PD njëherësh dhe Drejtuesi Politik për qarkun e Tiranës, Belind Këlliçi, u zotua se PD do të mbrojë votën e qytetarëve në zgjedhjet e 11 Majit.
“Votave i merr të keqen kësaj here Edi Rama se jemi ne të gjithë në këmbë kudo jo vetëm në Shqipëri, por në të gjithë botën. Nuk ka shanc që të prekë më vota Edi Rama. Këtë ta garantoj”, tha Këlliçi.
Demokratët u bënë thirrje qytetarëve që jetojnë jashtë vendit që të kthehen të investojnë në Shqipëri, duke theksuar se kur PD të rikthehet në pushtet do të kenë zero taksa për 5 vite.
Klan News
