Pas lajmit se Arta Vorpsi është betuar para noteres për marrjen e detyrës së anëtares së Gjykatës Kushtetuese ka reaguar Presidenca.
Në një reagim në Facebook, zëdhënësi i presidencës, Tedi Blushi ka ironizuar këtë veprim duke shkruar se Presidenti nuk ndalon askënd të betohet te noterja dhe as te parukierja.
“Të dashur gazetarë, Lidhur me pyetjet tuaja për një lajm qesharak që qarkullon në media, dua t’ju sqaroj se: Presidenti i Republikës Sh.T.Z Ilir Meta nuk ndalon askënd të betohet as tek noterja, as tek parukierja. Presidenti Meta është betuar me dorë mbi Kushtetutë dhe për të Shqipëria dhe shqiptarët janë të parët” shkruan zëdhënësi i Presidencës.
Pak më parë gjyqtarja Arta Vorpsi njoftoi Presidentin, Kuvendin dhe KED se ajo kishte bërë betimin në Kushtetutë para një notereje pasi e konsideronte veten anëtare të Gjykatës Kushtetuese meqenëse Presidenti nuk u shpreh për emërimin e tij.
Ende pritet një argumentim ligjor në lidhje me anashkalimin e dispozitës ligjore se anëtarët e Gjykatës Kushtetuese duhet të betohen para presidentit për të marrë detyrën. /Opinion.al
