Bashkimi Evropian po e ndryshon qasjen paqësore ndaj konflikteve të armatosura, tani që lufta i erdhi tek dera me sulmin rus ndaj Ukrainës.
Në Konferencën e Sigurisë në Mynih, presidentja e Komisionit Europian u bëri thirrje vendeve anëtare të unionit, të përshpejtojnë procedurat për furnizimin e Ukrainës me armë e municione, për t’i bërë ballë rinisjes së pritshme të sulmit rus.
“Mendoj se tani është me të vërtetë koha për të përshpejtuar dhe shumëfishuar prodhimin e armëve për të cilat Ukraina ka tmerrsisht nevojë. Nuk mund të presim me muaj e vite pasi të rifurnizohemi ne e më pas të furnizojmë Ukrainën.”
Luftën në Ukrainë, sekretari i Përgjithshëm të NATO-s, Jens Stoltenberg e sheh si shenjë që tregon se tani është koha e zgjerimit të aleancës.
“Pa NATO-n, në Europë nuk ka siguri. Është koha të shohim përtej aleancës, ta forcojmë dhe ta zgjerojmë atë.”
Zgjerimin e aleancës, Moska e sheh si kërcënim dhe e renditi mes argumenteve të saj, pse e sulmoi Ukrainën. Ndërsa për diplomatin që përfaqëson Kinën në këtë konferencë Uang Ji nuk është momenti për t’i hedhur benzinë zjarrit, ndaj u bëri thirrje shokëve europianë, të mendojnë se si t’i japin fund luftës.
Tv Klan
