Kryetarja e Lidhjes së Gruas të PDSH-së, Albana Vokshi ka zhvilluar ditën e sotme një takim me gratë në qytetin e Vlorës.
Ish-deputetja demokrate u kërkoi atyre që të jenë pjesëmarrëse në protestat e opozitës, në mënyrë që të rrëzojnë qeverinë “Rama”.
Ajo u shpreh se rrëzimi i kryeministrit Edi Rama do t’i hap rrugë krijimit të një qeverie tranzitore, e cila do e çojë vendin në zgjedhje të lira dhe të ndershme.
Sipas saj, arsyeja e djegies së mandateve ishte se opozita nuk mund të qëndronte si fasadë në një Kuvend ilegjitim.
Gjithashtu, Vokshi foli dhe për situatën e krimeve në qytetin bregdetar, duke thënë se statistikat janë si një bilanc lufte, ndërsa përgjegjësin u la strukturave të policisë dhe prokurorisë .
“Opozita, pas protestës së 16 shkurtit, vendosi që të lërë mandatet. Pra, nënjëfarë mënyre, pasi kemi provuar çdo mënyrë institucionale, çdo hapësirë që kishim brenda parlamentit, brenda institucioneve, ne vendosëm të mos ishim më fasadë. Nuk ka asnjë bisedim, për aq kohë sa Edi Rama është në krye të qeverisë. Kërkesa e PD është të ikë Edi Rama dhe të krijohet një qeveri tranzitore. Pa ikur Edi Rama nuk ka asnjë vendim, as për zgjedhje lokale. Sigurisht vetëm qeveri tranzitore pa Edi Ramën, mandati i të cilës të jetë zgjedhje të parakohshme por të sigurojë kushtet që çdo qytetar të votojë i lirë.
Vetëm në muajt e fundit të 2018-s, Vlora ka patur 6 të vdekur, 11 të plagosur. 5 atentate. Ku është policia që në rastin më të mirë nuk reagon dhe në rastin më të keq është bërë palë. Jo më kot, ish-krerët e policisë, ose janë në kërkim, ose janë vrarë me atentate mafioze”, -tha Vokshi./ Opinion.al E.Xh.
