Policia ka shkatërruar një bandë grabitësish të banesave të plazhit, të cilët kanë kryer një seri vjedhjesh, përgjatë vijës bregdetare Himarë-Sarandë.
Burime zyrtare nga policia bëjnë me dije se në sajë të operacionit të koduar “Planifikimi”, janë arrestuar 7 persona, bashkëpunëtorë me njëri-tjetrin.
Në pranga kanë rënë:
1- Jurgen Balliu, 21 vjeç, banues në Bulqizë.
2- Andrea Miha, 24 vjeç, banues në Bulqizë.
3- Ertigen Alla, 19 vjeç, banues në Bulqizë.
4- Algert Disha, 20 vjeç, banues në Bulqizë.
5- Hasan Toska, 21 vjeç, lindur në Bulqizë, banues në Tiranë.
6- G.D., 16 vjeç, lindur në Bulqizë, banues në Tiranë.
7- Edmond Abazi, 28 vjeç, banues në Sarandë.
Sipas policisë, Edmond Abazi, njihej gjithashtu me pseudonimin “Monçja”, pasi duke qenë njohës i mirë i terrenit, mundësonte gjetjen e banesave dhe orientonte grupin për të kryer vjedhjet dhe shitjen e sendeve të vjedhura.
Këta persona në bashkëpumim me njëri-tjetrin, dyshohet se kanë kryer një seri vjedhjesh, 20 prej tyre të dokumentuara, duke hapur me forcë banesat e plazhit dhe konkretisht duke përfituar momentin kur pushuesit largoheshin nga banesat e tyre, me qira.
Gjatë një pune hetimore prej 2-muajsh, Policia e Vlorës ka bërë zbulimin e disa vjedhjeve banesash, por edhe lokalesh apo automjetesh, në të gjithë vijën bregdetare, duke filluar nga Himara, fshatrat turistikë përreth, deri në Sarandë, Ksamil, me qëllim shitjen e sendeve të vjedhura për përfitime vetjake ose në grup.
Materiale kryesore të vjedhura kanë rezultuar të tipit: monedha, bizhuteri, vlera monetare (lekë), aparatë celularë, dhe një pjesë e tyre janë të sekuestruara në cilësinë e provës materiale.
Dyshohet se këta shtetas kanë kryer edhe 15 vjedhje të tjera, për të cilat po punohet për dokumentimin e plotë të tyre.
Kjo bandë grabitëse ishte kthyer në një makth frike për pushuesit vendas dhe të huaj pranë këtyre zonave turistike./tvklan.al
