Presidentja në detyrë e Kosovës, Vjosa Osmani ka deklaruar se do të caktojë datën e zgjedhjeve të parakohshme sapo palët të marrin aktgjykimin e plotë të Gjykatës Kushtetuese.
Osmani reagoi pas takimeve të zhvilluara me të gjitha partitë politike të përfaqësuara në Kuvendin e Kosovës. Ndërkohë që në njoftimin zyrtar bëhet e ditur se Vjosa Osmani do të zhvillojë takime edhe me KQZ e institucione të tjera kompetente për zgjedhjet.
“Në takime është diskutuar për mbajtjen e zgjedhjeve të jashtëzakonshme. Pas përfundimit të takimeve dhe diskutimeve përmbajtësore me të gjitha subjektet politike, Presidentja Osmani ka theksuar se sapo palët ta marrin Aktgjykimin e plotë të Gjykatës Kushtetuese, menjëherë do të caktohet data e mbajtjes së zgjedhjeve të jashtëzakonshme. U.d. Presidentja do të mbajë takime edhe me KQZ-në si dhe institucione të tjera relevante në mënyrë që organizimi i zgjedhjeve të bëhet sipas standardeve më të larta”, sqarohet në njoftimin për mediat./Opinion.al
