Vizita e kryetarit të parlamentit shqiptar në Greqi, Ilir Meta dhe qendrimi që ai mbajti për çështjen çame është kritikuar nga politikanët shqiptarë. Pas kreut të PDIU-së, Shpëtim Idrizi ka reaguar edhe deputeti demokrat, Eduard Selami.
Selami e quan të turpshme këtë vizitë dhe thotë se “ndërsa BE njeh çështjen çame, kreu i Kuvendit ngushëllon Greqinë”.
Meta do të shprehej një ditë më parë në Greqi se “jemi në një proces shumë pozitiv të përafrimit të qëndrimeve për shumë çështje të ndryshme të trashëguara nga e kaluara, ku do të doja të veçoja sidomos çështjen e rishikimit të historisë dhe të teksteve të historisë. Në këtë kuadër unë besoj se për çështjen ‘çame’ që ju pyetët, ekzistojnë ende dy qasje të ndryshme le të themi, por unë besoj se me durim dhe mënyrë konstruktive, ne kemi mundësi të ecim për gjithë problemet e së kaluarës drejt një zgjidhjeje ku përfitojnë të dy vendet tona dhe të dy popujt tanë”.
Ndërsa, kryetari i Partisë për Drejtësi Integrim dhe Unitet, Shpëtim Idrizi ka kërkuar që Meta të tregohet dinjitoz dhe të mbajë qëndrim për çështjen çame. “Kotzias deklaron se Greqia nuk e njeh dhe nuk do ta njohë kurrë çëshjen çame. Jam besimplotë që z. Meta, në cilësinë e Kryetarit të Kuvendit, së bashku me delegacionin shumë ngjyrësh që e shoqëron të mbajë qëndrime të qarta për çështjen çame si detyrim i Rezolutës së Parlamentit të Shqipërisë dhe në vijimësi të qëndrimit të tij në Athinë në vitin 2001 në cilësinë e Kryeministrit”, do të shprehej Idrizi një ditë më parë.
Sot, vizita e kreut të Kuvendit Meta në Greqi do të vazhdojë me pritjen nga Presidenti i Republikës greke, takimet në parlament, me homologun e tij grek, por edhe kryetarët e partive kryesore vendase dhe do të finalizohet të mërkurën, kur do të takohet me Kryeministrin Aleksis Tsipras. /Opinion.al
