Shënohet viktima e 6-të nga moti i keq në vendin tonë. Sot u raportua vdekja e 53 vjeçarit Ajet Zikollari nga fshati Selcë e Sipërme e Pogradecit. Sipas banorëve të zonës, Zikollari kishte shkuar për të marrë ushqime për familjen me një gomar në Proptisht, por nuk ishte kthyer më. Familjarët dhe të afërmit e tij nisën kërkimet, pasi 53-vjeçari nuk ishte kthyer prej dy ditësh. Pasditen e dielës ai është gjetur i ngrirë në dëborë.
Kronologjia; viktimat e të ftohtit
Më 5 janar: Në fshatin Ravonik të Korçës është gjetur një person i pajetë në rrugë. Viktima ishte duke shkuar në punë me biçikletë. Jani Poda, 61 vjeç ishte nisur për në punë në mëngjes herët si çdo ditë, por teksa ishte duke ecur me biçikletë, ka gjetur vdekjen e menjëhershme. Babai i dy fëmijëve punonte në një fabrikë këpucësh dhe dyshohet se ka pësuar infarkt nga i ftohti.
10 Janar: Një tjetër person ka humbur jetën nga i ftohti në Korçë. Një burrë rreth 60 vjeç është gjetur pa jetë tek vendi i quajtur “Parku i mallrave”. Endacaku ishte strehuar tek godina e ish-poligonit të bonifikimit, tashmë bosh. Ai jetonte i vetëm në godinat e braktisura dhe endej rrugëve në kërkim të ndonjë lëmoshe.
Më 11 Janar humb jetën Vasil Mati, 65 vjeç. Ai ishte roje në Manastirin e Çifligut. Ka qenë një banor që e ka parë trupin e rrëzuar përtokë i mbuluar nga dëbora. Kërkimet për 65 vjeçarin kishte nisur edhe bashkëshortja, pasi nuk po merrte përgjigje prej tij në celular. Ekspertiza mjeko ligjore konstatoi, se ka humbur jetën, si pasojë e një ataku kardiak, i provokuar nga temperaturat ekstreme të të ftohtit.
11 Janar-Nga moti i keq dhe i ftohti ka vdekur dhe një elektricist në Mirditë. Punonjës i Operatorit të Sistemit të Transmetimit (OST) ka humbur jetën mbrëmjen e enjtes pasi i ka rënë infarkt teksa po punonte. Angjelin Qafa, 57 vjeç ka ndërruar jetë teksa po mundohej të riparonte defektet në rrjetin elektrik.
12 Janar- Një 68-vjeçar ka ndërruar jetë mbrëmjen e së shtunës në QSUT, Tiranë. Ai është Hasan Hykja. Zëdhënësja e Partisë Demokratike thotë se ai ishte endacak, ndërsa ndërroi jetë nga i ftohti, pasi sipas saj nuk u pranua nga qendrat sociale se kishte këmbën sëmurë.
/Opinion.al
