Ashtu siç edhe e kishte paralajmëruar, Partia Demokratike ka marrë pjesë ditën e sotme në komisionet e zhvilluara. Fillimisht në komisionin e mediave, PD ka kërkuar dorëheqjen e Fatmir Xhafaj, ndërsa e njëjta situatë ka ndodhur edhe në komisionin e Ekonomisë.
Kreu i Grupit të PD, Edmond Spaho dhe deputetët e opozitës janë vendosur përballë mazhorancës në shenjë proteste; kreu i komisionit Erion Braçe ka tentuar të vendosë rregull dhe të shmangë aksionin e opozitës, por nuk ka mundur.
Deputetët e PD dhe LSI kanë vazhduar të qendrojnë disa ulur dhe disa në këmbë para tij ndërkohë që Braçe moralizonte se nuk ishte më sistemi kur një parti vendoste fatin e dikujt që mund të pushkatohet, por se duhet të funksiononin institucionet.
“Jam shumë i sigurtë që duhet të funksionojë shteti – tha Braçe, – dhe nuk është një parti politike që jep vendime. Deputeti vendosej të pushkatohej dhe pastaj ai pushkatohej vetë.”
“Lëre tani këtë muhabet”, qe reagimi nga opozita.
Braçe vazhdoi: “A ka mundësi të mbaroj unë?! Institucionet duhet të veprojnë.”
