Djali me të cilin ajo kishte pasur një histori dashurie deri para 6 muajsh, i bënte shantazh me publikimin e një videoje intime në rrjetet sociale. Për të mos e publikuar videon, ai i kërkonte 2 mijë euro, por kjo nuk i jepte asnjë siguri vajzës me iniciale K.L., pasi shantazhi mund të vazhdonte edhe pasi të bënte pagesën.
Për këtë arsye, e dëmtuara i është drejtuar Drejtorisë së Policisë së Tiranës, ku ka denoncuar shtetasin Erjon Bega, për shtrëngim me anë të kanosjes për dhënie pasurie. Burime zyrtare të Policisë thanë dje se pas kallëzimit të 21 vjeçares, oficerët e Seksionit për Krimet ndaj Jetës kanë regjistruar procedim penal më datë 3 maj të këtij viti.
Menjëherë kanë nisur hetimet në bashkëpunim me Prokurorinë e Krimeve të Rënda, për të siguruar prova, por edhe ndonjë bashkëpunëtor të mundshëm të shtetasit Erjon Bega, në shantazhin ndaj vajzës me iniciale K.L. Pasi janë siguruar provat e mjaftueshme, Prokuroria ka dorëzuar në Gjykatë kërkesën për masën e sigurimit në mungesë për dy persona, si autorë të dyshuar për veprën penale “shtrëngim me anë të kanosjes për dhënie pasurie”.
ARRESTIMI
Paraditen e së martës, Gjykata ka vendosur masën e sigurisë arrest me burg për 21vjeçarin Erjon Bega dhe 25vjeçarin me iniciale A.S. Masa është ekzekutuar të martën në mesditë nga ana e oficerëve të Krimeve Kundër Jetës, që kanë bërë të mundur arrestimin e njërit prej të dyshuarve, shtetasin Erjon Bega.
Ndërsa është shpallur në kërkim bashkëpunëtori i tij, i cili nuk është gjetur ende nga ana e Policisë. “Në vijim të komunikatës së datës 3 maj, që bën fjalë për shtrëngim me anë të kanosjes të shtetases K.L. për dhënien e 2 mijë eurove në këmbim të mospublikimit të një videoje intime, më datë 21 qershor u ndalua shtetasi Erjon Bega dhe u referuan materialet në Prokurorinë e Krimeve të Rënda Tiranë, për shtetasin A.S., pasi Gjykata ka caktuar masë sigurie ‘arrest me burg’”, tha dje Policia e Tiranës.
Burimet sqaruan se i arrestuari, i cili është ishi dashuri i të dëmtuarës, në bashkëpunim me personin që tashmë është shpallur në kërkim, i kanë bërë presion 21vjeçares, nëpërmjet telefonit dhe rrjeteve sociale, se do t’i publikonin videon intime.
Këtë video, e posedonte 21 vjeçari Bega, që nga koha kur kishte qenë i lidhur me të dëmtuarën dhe e kërcënonte se do ta publikonte në Facebook, në rast se ajo nuk i jepte 2 mijë euro. /Etleva Delia Panorama.al
