Diego Armando Maradona ka bërë sërish kirurgji kozmetike dhe u përfshi në një skandal. Mbrëmjen e së dielës, ai po kthehej nga Dubai, ku aktualisht banon për çështje pune, bashkë me partneren aktuale, Rocio Oliva. Ai u mbajt në aeroportin “Ezeiza”, i akuzuar për përdorim të një pasaporte të vjedhur, e cila e çoi mitin e futbollit botëror në tërbim, duke akuzuar presidentin e Argjentinës, Mauricio Macri, si autor të kësaj gjëje, si hakmarrje për kritikat e bëra ndaj tij.
Pas kthimit, Maradona iu nënshtrua një ndërhyrjeje maksilofaciale, për përtëritje të fytyrës. Fotot e Diego Maradonës duke lënë klinikën, me një fytyrë të fryrë dhe një gjurmë gjaku, kanë bërë xhiron e botës. Me këtë rast u zbulua edhe episodi i pasaportës, teksa në “Ezeiza”, Maradonës i ishte refuzuar leja për të hipur në avion, me pretendimin se dokumenti identifikues që mbante me vete ishte raportuar i vjedhur! Ish-lojtari i Barcelonës dhe Napolit shpërtheu, duke pretenduar se nuk kishte një raport të tillë për ndonjë vjedhje dhe se pasaporta e tij nuk kishte asgjë të rreme, por ishte 100% legale.
