Pas humbjes me Juventusin mund të vijë gjatë javës një tjetër “humbje” edhe më e rëndë për Milanin. Incidentet që u krijuan pas ndeshjes mund t’i kushtojnë rëndë katër lojtarëve kuqezinj, portierit Donnarumma, sulmuesit Bacca, mesfushorit Poli dhe mbrojtësit De Sciglio, që rrezikojnë të pezullohen. Ata patën polemika të ashpra ndaj gjyqtarit, ndaj dhe do të jetë gjykatësi sportive ai që do të vendosë për fatin e lojtarëve, pasi të verifikojë gjithçka përmes pamjeve televizive. Ai që rrezikon pezullimin më të rëndë është sulmuesi Carlos Bacca, që u mbajt nga Montella dhe Galliani për të evituar ndonjë incident edhe më të rëndë karshi gjyqtarit.
Përveç sulmuesit kolumbian në ankth janë edhe De Sciglio, Poli e Donnarumma, që kanë qenë ndër më të nervozuarit pas vendimit të gjyqtarit për të dhënë penallti në favor të Juventusit në minutat shtesë. Ndërkohë që, në takimin e radhës do të mungojnë mbrojtësi Romagnoli, për shkak të klartonave të verdhë dhe mesfushori Sosa, që doli nga fusha me të kuq. Por edhe drejtori sportiv Adriano Galliani rrezikon rëndë, pasi pamjet televizive tregojnë se ai shoqëron dhe debaton me gjyqtarin teksa ai largohet nga fusha. Gjithçka në lidhje me këto pezullime do të vendoset edhe nga raporti i gjyqtarit të ndeshjes, se çfarë do të shkruajë ai.
