Është tensionuar situate në pikën kufitare të Kapshticës ku prej 3 ditësh tashmë kanë ngelur të bllokuar dhjetëra qytetarë shqiptarë të cilët kërkojnë të kthehen në Shqipëri.
Ata kanë bllokuar rrugën dhe nuk do lejojnë kalimin e kamionëve derisa të zgjidhet situata e tyre.
Në vendngjarje kanë mbërritur edhe forcat e policisë të cilët kanë krijuar një kordon për të ndaluar kalimin e kufirit. Në pamje shihet se ka patur edhe përplasje mes qytetarëve dhe forcave të policisë, ndërkohë që kamionët e transportit presin të bllokuar për hapjen e rrugës.
Si pjesë e masave për të frenuar përhapjen e koronavirusit qeveria ka vendosur mbylljen e kufijëve për individët. Kryeministri Edi Rama i ka bërë thirrje qytetarëve shqiptarë që ndodhen jashtë kufijve që të mos përpiqen të vijnë në Shqipëri, pasi nuk do të lejohen të futen.
Nga ana tjetër opozita ka bërë thirrje të vazhdueshme që qytetarët të lejohen të kalojnë. Më herët gjatë ditës së sotme edhe Presidenti Ilir Meta i bëri thirrje qeverisë që të respektojë detyrimet kushtetuese që ka shteti ndaj qytetarëve të vet në një situatë të tillë. /Opinion.al
