“Kryetari i Bashkisë së Kukësit më ka kërkuar me shkrim një takim, unë do të ulem me të qysh të hënën për të bashkëbiseduar, sigurisht duke shpresuar se deri të hënën, ai do të jetë distancuar jo nga kundërshtia për pagesën, por nga dhuna kriminale”. Kështu deklaroi Edi Rama kryeministri i vendit, të shtunën në mbrëmje. Por pas kësaj deklarate 23 kukësianë u arrestuan nga policia e prokuroria për protestën në Rrugën e Kombit fundjavën që lamë pas.
Pas këtyre arrestimeve, me dhjetëra qytetarë janë duke protestuar përpara Drejtorisë së Policisë, ndërsa Kryebashkiaku i Kukësit, Bashkim Shehu nuk është i gatshëm ta takojë Kryeministrin. Anullimi i takimit lidhet me mos përmbushjen nga Kryeministri të kushtit të vendosur nga Shehu për lirimin e qytetarëve.
Sot gjatë takimit me familjarët e të arrestuarve në Kukës, Shehu tha se” lirimi i menjëhershëm i të shoqëruarve është kusht i panegociueshëm”.
Sipas tij në një kohë kur drejtohet publikisht për bisedime e negociata, Kryeministri arreston qytetarët gjatë natës dhe mëngjesit duke minuar çdo lloj diskutimi që mund të bëhej në vijim rreth kushteve të kontratës koncesionare apo heqjes së saj për banorët e Kukësit.
