Besart Berisha ka treguar se në të kaluarën ka qenë shumë pranë firmës me dy prej klubeve më të njohura angleze, Mançester Junajtid dhe Liverpul, para se t’i bashkohej Bërnlit në atë që rezultoi një eksperiencë e dështuar për të në Angli.
Ai iu bashkua skuadrës në vitin 2007, por u largua pa dhënë kontributin e tij në sezonin në Premier Ligë për shkak të një dëmtimi. Sipas vetë lojtarit, gjërat mund të kishin rrjedhur plotësisht ndryshe, pas miqësores që Shqipëria humbi 31 ndaj Anglisë pikërisht në stadiumin e Bërnlit
Futbollisti në atë ndeshje mbolli panik mes mbrojtjes angleze sa herë kishte topin në këmbë dhe pasi goditi traversën, gjeti edhe rrugën e rrjetës, ndërsa askush nuk dukej në gjendje ta ndalte. Nuk ishte rastësi që të gjithë thurën elozhe për sulmuesin shqiptar. “Bëra një ndeshje të pabesueshme kundër Anglisë”, kujton Berisha. “Isha në maksimumin e formës time. Me të vërtetë, më kujtohet që më ndiqnin të gjithë klubet e Premier Ligës por Bërnli u tregua i shpejtë të siguronte firmën time.
Por dëgjova se kishte edhe klube të tjera që interesoheshin. Menaxheri im më tha se edhe Mançester Junajtid me Liverpulin ishin të interesuar”, tregoi Berisha për faqen zyrtare të internetit të ALeague, kampionatit australian ku ai është kthyer në një prej yjeve më të shndritshëm.
