Reali i Madridit e ka filluar me trofe këtë sezon futbollistik teksa ka triumfuar mbrëmjen e sotme në Shkup kundër Mançester Junajtidit në ndeshjen e Superkupës së Europës.
Madrilenët e drejtuar nga Zinedin Zidan e nisën ndeshjen pa Kristiano Ronaldon, i cili filloi stërvitjen me skuadrën vetëm para disa ditësh, por megjithatë u treguan që në fillim shumë të qartë se kundërshtarët.
Kasemiro kaloi kampionët e Europës në avantazh në minutën e 24-t dhe pjesa e parë u mbyll 1-0. Në pjesën e dytë ishte Isko ai që dyfishoi shifrat me golin e realizuar në minutën e 52-të, ndërsa Lukaku ngushtoi diferencën në minutën e 62-të. Megjithatë deri në fund spanjollët arritën të ruanin avantazhin për të ngritur në qiell një tjetër trofe.
Pas Ligës së Kampioneve, Reali i Madridit mbrojti edhe trofeun e Superkupës të cilin e kishte fituar gjithashtu vitin e kaluar. Ky ishte suksesi i 4-t i “galaktikëve” në këtë kompeticion.
REAL MADRID – MANÇESTER JUNAJTID 2-1
Kasemiro 24′, Isko 52′ / Lukaku 62′
