Kryeministri Edi Rama gjatë vizitës në Bruksel ka takuar shefen e diplomacisë së BE, Federica Mogherini. Ata dhanë një deklaratë të përbashkët për mediat, ku u vunë re vetëm fjalët e mira për njëri tjetrin. “Kryeministri ka bërë punë të mirë në luftimin e drogës dhe korrupsionit”, tha Mogherini ndërsa për çeljen e negociatave Shqipëri-BE ajo nuk dha asnjë afat.
Kujtojmë se vendi ynë prej vitesh pret që të hapet drita jeshile drejt anëtarësimit në BE, por procesi ka mbetur i stopuar. Kujtojmë se me vendet e tjera të rajonit, Serbinë dhe Mali i Zi, Bashkimi Europian i ka nisur negociatat e anëtarësimit.
Më poshtë deklaratat e plotë të ramës dhe Mogherinit, transmetuar për mediat nga zyra e shtypit e Kryeministrit.
Mogherini: “Është një kënaqësi për mua të mirëpres, përsëri, Kryeministrin Rama, në një moment veçanërisht të rëndësishëm për rrugën e Shqipërisë drejt BE-së. Nën lidershipin e tij, Shqipëria ka bërë një punë të jashtëzakonshme, veçanërisht në Reformën e Drejtësisë, luftën kundër drogës dhe korrupsionit, një punë që ne e mbështesim e që duhet të vazhdojë përpara dhe kjo është një punë që mund të hapë rrugën drejt hapave të mëtejshëm të procesit të integrimit në BE. Jam e lumtur që kam përsëri këtë mundësi për të diskutuar së bashku mënyrën se si këto hapa mund të shndërrohen në një opsion të vërtetë në fillim të vitit të ardhshëm”.
Rama: “Faleminderit dhe është një kënaqësi si gjithmonë që të vij t’iu takoj, veçanërisht në këtë moment kur ne shpresojmë në një rezultat pozitiv të të gjithë përpjekjeve të përbashkëta me fillimin e negociatave të anëtarësimit. Jam shumë krenar që kam ardhur këtu me më shumë rezultate të mira dhe jam i sigurt që do të kemi edhe më shumë në muajt e ardhshëm”.
/Opinion.al
