Kryeministri Edi Rama gjatë një takimi me anëtarët e qeverisë ka reaguar pas vendimit të djeshëm në Luksemburg, që dhanë ministrat e jashtëm të vendeve europiane, për shtyrjen e negociatave me një vit.
Rama iu kundërvu opozitës dhe e akuzoi këtë të fundit për sulmet e djeshme, me pretendimin se negociatat u shtynë.
“E dhimbshme por fatkeqësisht e vërtetë, që teksa ne merrnim telefonatat e urimeve dhe mediat serioze europiane lajmëronin për hapjen e negociatave, opozita jonë sadiste dhe mediat e reshtuara pranë saj hidhnin gurët.
“U shty data, u shty data sepse Europa refuzoi narko-qeverinë”, çfarë vulgariteti, çfarë pabesie nga këta nipër të Esat Pashë Toptanit.
Po si mund të shtyhet një datë që ende nuk është vënë, si mund të vendosë BE një datë me një vend të zhytur në krim e korrupsion. Si mund të flitet kështu, kaq ligësisht dhe poshtërsisht, e si mund të trajtohen kaq brutalisht zgjedhësit e tu, si të ishin një kope pa din e iman.
Së bashku me Ditmirin, na është dashur të kryejmë një numër rekord komunikimesh me nivelet më të larta të shteteve anëtare. Kemi parë e dëgjuar gjëra që askush s’i mendon. Dhe nëse do të vijoja të shkruaja Kurbanin do të dilnin dy volume, “Moj Europë t’u bëfsha kurban” dhe “Moj Europë m’u bëfsh kurban”.
Të huajtë pyesnin po si ka mundësi që opozita juaj të paguajë media në vendet tona për të shpërfyryruar vendin tuaj, e duke mos lënë deputet pa kapur e për të ndërsyer kë të mundet në ato vende ku ka erëra anti-europiane. Si ka mundësi? Ja pra që ka mundësi se kjo është fryma e vetme e opozitës që në frymë ka Esat Pashën, Sali Efendiun dhe në fytyrë ka Babale Veliun”, tha Rama.
“Pas shumë muajsh përpjeke të përditshme, mes dallgëve të ngritura artificialisht nga opozita sadiste, që s’la vesh të huaj pa përmbytur mes dallgëve të Shqipërisë, Shqipëria mori datën zyrtare të çeljes së negociatave. Pas datës u çel drita jeshile për anëtarësim në BE. E dhimbshme por e vërtetë, qe teksa ne merrnim telefonata urimi, opozita jonë esadiste, dhe mediat e saj, hidhnin gurët e vulgaritetin të tyre për tu prishur shqiptarëve lodhjen e shumifishtë. U shty data, u shty data se Europa nuk pranoi narkoshtetin. Çfarë vulgariteti, çfarë poshtërisë. Si mund të shtyhet një datë që nuk është vënë? Si mund të flitet kështu kaq ligësisht dhe poshtërsisht për vendin tënd. Si mund të keqtrajtohen brutalisht zgjedhësit e tu si të ishin kope qorrash që duhen hedhur në lumë”, tha Rama.
