Në prag të fushatës elektorale për zgjedhjet parlamentare të 25 qershorit, Partia Demokratike e udhëhequr nga Lulzim Basha lidhi dy kontrata me lobistin e saj në Uashington, ‘Stonington Strategies’, në mënyrë që të siguronte takime të nivelit të lartë me administratën e Presidentit Donald Trump.
Referuar një faksimilje të një formulari të publikuar në emisionin ‘Opinion’, ish-deputeti i PS-së, Alfred Peza tregoi se janë realizuar dy pagesa nga Partia Demokratike dhe një kompani guackë e regjistruar në Skoci me emrin “Biniatta Trade LP”- ku kapin një vlerë totale prej 675 mijë USD dhe ku përfshihen tarifat mujore të firmës si dhe pagesat për shpenzimet e saj.
Peza tha se shqetësimi i revistës ‘Mother Jones’ është se nëpërmjet parave ruse, po blihet influenca amerikane në Ballkan.
