Partia Demokratike ka akuzuar qeverinë se po fsheh të vërtetën për humbjen e jetës se 24 njerëzve nga 2 pallatet e shembura ne Thumane.
Sekretari i Përgjithshëm i PD-së, Gazment Bardhi ka publikuar një video ku përballë janë deklarata e dy zyrtarëve.
“2 ditë pas tërmetit, Erion Braçe dhe Artur Bushi japin 2 përgjigje të ndryshme, nëse pallatet ishin shpallur apo jo të banueshme pas 21 Shtatorit. Kjo do të thotë se ata po fshehin të vërtetën, po përpiqen ta shtrembërojnë për të shpëtuar nga përgjegjësia” thekson zoti Bardhi.
https://www.facebook.com/gazment.bardhi/videos/10220793089246763/
Për të bërë drejtësi për 24 njerëzit që humbën jetën nga shembja e dy pallateve, Partia Demokratike ka kërkuar zyrtarisht përgjigje për masat e marra për sigurinë e banorëve nga qeveria dhe Bashkia e Krujës pas tërmetit të 21 Shtatorit.
“Deri tani, qeveria ka heshtur dhe është fshehur pas spektaklit kriminal të kreut të saj, i cili nuk kursen as fëmijët e mbijetuar”, thekson Sekretari i Përgjithshëm i PD-së./ Opinion.al
