Një ngjarje e rëndë është regjistruar në Francë paraditen e kësaj të marte, duke vendosur policinë në qendër të kritikave nga qytetarët.
Kjo pasi oficerët në Nanterre të Parisit, zbrazën armët e zjarrit mbi një djal 17-vjeçar që kishte shkelur rregullat e qarkullimit rrugor dhe sipas autoriteteve refuzoi të ndalonte pas thirrjes së tyre.
Në Francë ka nisur një hetim për të shtënat ndërsa pamjet e incidentit po bëjnë xhiron e rrjetit, pasi është filmuar nga kalimtarët.
Aty shihet se i riu nuk pranoi të ndalonte dhe përpiqet të largohet me makinë, por policët e qëllojnë dhe e plagosin rëndë.
Në automjet ndodheshin edhe dy persona të tjerë. Pasagjeri i parë u arratis, por i dyti, gjithashtu i mitur, u arrestua dhe u dërgua në paraburgim.
Ekipet e shpëtimit u përpoqën ta shpëtonin 17-vjeçarin e identifikuar si Naël M. duke i bërë masazh kardiak, por ai ka ndërruar jetë në vend.
Autoritetet kompetente kanë nisur hetimet për vrasje të mundshme me dashje nga një person me pozitë të autoritetit publik.
Ndërkohë një tjetër hetim është duke u zhvilluar nga policia rajonale lidhur me mosndalimin e drejtuesit të mjetit dhe tentativën e vrasjes së një personi me detyrë autoriteti publik.
