Bora ia ka lënë vendin akullit. Kështu në Korçë rrugët dytësore dhe trotuaret kanë ngrirë. Për pasojë shumë qytetarë janë rrëzuar duke përfunduar me thyerje të gjymtyrëve në urgjencë.
Urgjenca e spitalit të Korçës, prej fillimit të Janarit ka pritur dhe trajtuar mbi 40 raste të thyerjeve apo frakturave, pasojë e rrëzimit nga ngricat. Mosha më e prekur është ajo e mesme dhe të moshuarit, por nuk kanë munguar as dëmtimet e gjymtyrëve tek fëmijët.
“Pranë urgjencës së spitalit tonë, repartit të ortopedisë janë paraqitur afërsisht 41 persona me dëmtime të ndryshme që i përkasin rrëshqitjes në akull dhe i përkasin grupmoshave të ndryshme. Më të shtuara janë grupmoshat 35-45 vjeç”, tha Koço Mati, mjek ortoped.
Trashësia e akullit është e konsiderueshme dhe qytetarët nuk e heqin dot vetë edhe pse janë përpjekur të pastrojnë sa munden. Ata janë të irrituar me Bashkinë e Korçës që sipas tyre nuk hedh kripë. Në kushtet kur akulli vazhdon të jetë prezent ne çdo lagje, mjeku këshillon të tregohet kujdes me ekspozimet jashtë.
