Mjekët dhe infermierë shqiptarë që u nisën drejt Italisë, për të ndihmuar kolegët e vendit fqinj në luftën kundër koronavirusit, tërhoqën vëmendjen e zyrtarëve më të lartë por dhe të gjithë popullit italian.
Duke e cilësuar si një gjest fisnik dhe një solidaritet të pashoq në një kohë tejet të veshtirë për popullin e tyre, italianët, nuk rreshtin së falenderuari shqiptarët.
Kështu, videoja e një qytetari italian, që në shenjë falenderimi luan në flaut himnin shqiptar nga ballkoni i banesës së tij, po bëhët virale.
“Nuk besoj që Shqipëria ka mjaftueshëm para sa për t’i hedhur jashtë. Jam i emocionuar, është si të kesh një mik që ka euron e fundit në xhep dhe ta jep ty. Kjo është diçka shumë e bukur. Prandaj, dua të falenderoj në mënyrën time të vogël vëllezërit tanë shqiptarë, që madje nuk janë akoma as pjesë e Europës. Pastaj, më lini t’ju them se kanë një himn që është i mrekullueshëm!”- u shpreh qytetari italian.
Videoja u shpërnda dhe nga kryeministi i vendit, Edi Rama, i cili shkroi se ka marrë me mijëra mesazhe, por kjo video e kishte drithëruar.
Dhjetë mjekët dhe njëzet infermierët shqiptarë, të cilët u nisën më 28 mars drejt Italisë për të ndihmuar në luftën kundër Covid-19, kanë marrë vëmendje ndërkombëtare.
Reuters, New York Times, Euronews, Balkan Insight, Il Messagerio, e te tjera media prestigjoze shkruanin për Shqipërinë, e cila edhe pse një nga vendet më të varfëra të Europës, dërgoi një ekip mjekësh dhe infermierësh në Itali për të ndihmuar pandeminë e koronavirusit.
Në artikuj theksohej gjithashtu fakti se Italia e ka ndihmuar Shqipërinë përgjatë historisë kur është përballur me disa kriza, si rënia e komunizmit apo anarkia e vitit 1997./Opinion.al
