Ky është momenti kur ish-drejtori i Policisë së Lezhës, Henerigert Mitri vetëdorëzohet në Policinë e Tiranës, pasi ishte i shpallur në kërkim nga operacioni i koduar “Revanshi”.
Në videon e siguruar nga “Opinion.al”, Mitri shihet teka shkon i qetë në Policinë e Tiranës, i shoqëruar nga avokati i tij, Ardian Leka.
Mitri është ish-drejtor i Policisë së Lezhës dhe po hetohet pasi ka dyshime se drejtonte kultivimin e kanabisit në Lezhë dhe organizonte aktivitetin e lojërave të fatit.
Pas urdhër-arresteve të lëshuara nga SPAK, Henerigert Mitri u përjashtua nga radhët e Policisë së Shtetit më 20 Maj 2024 me vendim të Drejtorit të Përgjithshëm të Policisë.
Konkretisht, Henerigert Mitri dyshohet se gjatë kohës që ushtronte detyrën e drejtorit të policisë së qarkut Lezhë së bashku me oficerin Klodian Shahini, gjithashtu i akuzuar nga SPAK, ushtronin aktivitetin e kultivimit të kanabisit dhe të lojërave të fatit në qarkun e Lezhës. E gjithë veprimtaria e tyre u zbulua nga zbardhja e komunikimeve në aplikacionin “Sky”.
Në momentin e lëshimit të urdhër-arresteve nga SPAK, Henerigert Mitri Henerigert Mitri mbante postin e shefit të Sektorit të Analizës së Riskut, në Drejtorinë e Menaxhimit dhe Drejtimit, në Departamentin për Sigurinë Publike.
