Mbani shënim këtë emër: Mikel Oyarzabal. Për momentin është djaloshi që ka rihapur luftën për titull në kampionatin spanjoll me golin e mrekullueshëm me kokë të shënuar të shtunën e kaluar në fitoren e arritur kundër Barcelonas nga Real Sociedad.
Lojtari i fundit që ka dalë nga moshat e ekipit nga San Sebastian ka qenë Antoine Griezman, i cili në 2009-ën ka kaluar direkt tek ekipi i parë, duke kapërcyer skuadrën e dytë.
Oyarzabal, këtë vit, ka luajtur 5 ndeshje me ekipin e dytë të Sociedad.
Një sezon që ka filluar duke luajtur në rrethinat e Madrid, kundër Rayo Majadahonda dhe Real Madrid Castilla në kategorinë e tertë, por që e ka braktisur në vjeshtë për t’u sistemuar te Real Sociedad.
David Moyes e ka grumbulluar me ekipin verën e kaluar dhe më 25 tetor e ka bërë të debutojë në Valencia me Levanten.
Pasardhësi i Moyes, Eusebio Sacristan, kultivues i lojtarëve të rinj i ka dhënë një shtysë të mëtejshme
rritjes së Mikel: 16 ndeshje në La Liga, madje 10 si titullar me 4 gola të shënuar, teksa 21 prillin e ardhshëm do të mbushë 19 vjeç. Sepse në Spanjë nuk kanë probleme t’i besojnë të rinjve, nuk kanë frikë se mos i djegin dhe i japin atyre kohën e nevojshme për t’u përshtatur dhe për t’u rritur.
Mikel njihet si një djalë i përgjegjshëm. Ka shkuar gjithmonë mirë në shkollë, studion ekonomi në universitetin e Deustos dhe jeton akoma në rezidencën ku qëndrojnë lojtarët e moshave të Real Sociedad. Deri vitin e kaluar bënte vajtjeardhje nga Eibar, qyteti ku ka lindur dhe me të cilin është shumë i lidhur. 110 km, që Mikel i bënte pa problem në tren për të shkuar në stërvitje dhe për t’u kthyer në shtëpi për të fjetur gjumë me familjen.
Me përfundimin e shkollës dhe shtimin e impenjimeve ai ka vendosur të transferohet në San Sebastian, por sapo i jepet mundësia shkon të shikojë Eibarin e tij. Atje është rritur dhe ka qëndruar për një kohë të gjatë, duke i rezistuar lajkave të Athletic Bilbaos. Ai dhe babai kanë preferuar Sociedad ku ka fituar titullin rajonal dhe një vit më pas është kthyer si huazim te të rinjtë e Eibar për të ndihmuar ekipin e zemrës, që luftonte për mbijetesë.
Objektivi është arritur dhe ai është kthyer në bazë. Mikel nuk do të ketë një menaxher dhe për momentin ndihmohet nga babai: të dy kanë rinovuar kontratën deri në 2021-in dhe nuk duken shumë të interesuar nga ofertat që i kanë shkuar nga Premier League.
[fbvideo link=”https://facebook.com/officialfootballgoals/videos/804327466337880/” width=”500″ height=”400″ onlyvideo=”1″]
