Një operacion policor i koduar “Ndërveprimi”, për goditjen e veprimtarisë kriminale në fushën e kultivimit dhe shpërndarjes së lëndëve narkotike, është finalizuar ditën e sotme nga policia.
Autoritetet kanë zbuluar një banesë të përshtatur për kultivim të bimëve narkotike me llamba.
Në kuadër të këtij operacioni u arrestua në flagrancë shtetasi A. K., 38 vjeç, për veprat penale “Kultivimi i bimëve narkotike” dhe “Prodhimi dhe shitja e narkotikëve”.
Ky shtetas u kap brenda në banesën e tij, të cilën e kishte përshtatur si “shtëpi bari” për kultivimin e bimëve narkotike me anë të llambave.
Gjatë kontrollit në banesën e shtetasit A. K., janë gjetur dhe sekuestruar vazo me fidanë kanabis të kultivuara në to, 31 llamba elektrike, një sasi rreth 140 gramë lëndë narkotike e dyshuar cannabis sativa, e cila ishte e ambalazhuar në 7 kavanozë qelqi të përmasave të ndryshme, një radio si ato që përdoren nga Policia, një bllokues valësh dhe një detektor për kërkimin e GPS./Opinion.al
